Pio Valenzuela 1869-1956

NHCP Photo Collection, 2023

NHCP Photo Collection, 2023

Location: Dr. Pio Valenzuela Street corner Kabesang Pino Street, Valenzuela City

Category: Personages

Type: Biographical marker

Status: Level II - Historical marker

Marker date: 14 February 2023

Installed by: National Historical Commission of the Philippines (NHCP)

Marker text:

PIO VALENZUELA

1869-1956

ISINILANG SA TAGALAG, POLO, BULACAN, 11 HULYO 1869. SUMAPI SA KATIPUNAN, 1892, HABANG NAG-AARAL NG MEDISINA SA UNIBERSIDAD NG SANTO TOMAS. KASAPI SA KATAASTAASANG SANGGUNIAN NG KATIPUNAN BILANG DOKTOR, ENERO 1895, AT TAGAUSIG, 1 ENERO 1896. TAGAPANGASIWA NG LIMBAGAN NG KATIPUNAN, 1896. TUMUNGO SA DAPITAN UPANG KAUSAPIN SI JOSE RIZAL HINGGIL SA REBOLUSYON, 15 HUNYO 1896. KASAMA SA PULONG NA NAGPAHAYAG NG PAGHIHIMAGSIK SA ESPANYA, 23 AGOSTO 1896. NADAKIP NG MGA KASTILA AT IPINIIT SA BILANGGUAN NG BILIBID, 1 SETYEMBRE 1896. IPINATAPON SA MELILLA, HILAGANG APRIKA, PEBRERO 1897-ABRIL 1899. IBINALIK NG PAMAHALAANG ESPANYOL SA MAYNILA AT IPINIIT NG MGA AMERIKANO SA INTRAMUROS, 1899. PINALAYA NANG MAGWAGI BILANG PUNONG BAYAN NG POLO, BULACAN, NGAYO’Y LUNGSOD NG VALENZUELA, 1899-1901. NAGLINGKOD NOONG PANDEMYA NG KOLERA SA PILIPINAS, 1902. NAGING GOBERNADOR NG BULACAN, 1921-1925. YUMAO, 6 ABRIL 1956.

Dr. Pio Valenzuela 1869–1956 Dakilang Katipunero at Lingkod ng Bayan

© Judgefloro/Wikimedia Commons

© Judgefloro/Wikimedia Commons

Location: Dr. Pio Valenzuela Street cor. Kabesang Pino Street, Pariancillo Villa, Valenzuela

Category: Personages

Type: Biographical marker

Status: Level II - Historical marker

Marker date: 1966

Installed by: National Historical Commission (NHC)

Marker text:

DR. PIO VALENZUELA 1869–1956

DAKILANG KATIPUNERO AT LINGKOD NG BAYAN

ISINILANG SI PIO VALENZUELA SA POLO, BULAKAN, NOONG HULYO 11, 1869. BUNSONG ANAK NINA KAPITAN FRANCISCO VALENZUELA AT LORENZANA ALEJANDRINO. UMANIB SA KATIPUNAN NOONG HULYO 15, 1892 NA ANG GINAMIT NA SAGISAG AY MADLANG-AWAY. BILANG SUGO NG KATIPUNAN, NAKIPAGKITA KAY JOSE RIZAL SA DAPITAN AT ISINANGGUNI ANG NAPIPINTONG PAGHIHIMAGSIK LABAN SA MGA KASTILA NA HINDI SINANG-AYUNAN NITONG HULI DAHIL SA KAKULANGAN NG SANDATA. SA BISA NG DEKRETO NI GOBERNADOR-HENERAL RAMON BLANCO NOONG AGOSTO 30, 1890, SI DR. VALENZUELA AY NAHATULANG MABILANGGO SA FUERZA SANTIAGO KASAMA SI ANTONIO LUNA AT IBA PA. NAKALAYA PAGKATAPOS NG KASUNDUAN SA PARIS, DISYEMBRE 10, 1898.

NAGING PUNONG-BAYAN NG POLO, SETYEMBRE 6, 1899; GOBERNADOR NG BULAKAN, 1919 AT 1922.

NAKIPAG-ISANG DIBDIB KAY MARCIANA DE CASTRO, OKTUBRE 9, 1900. YUMAO NOONG IKA-6 NG ABRIL 1956 SA POLO, BULAKAN.

BILANG PARANGAL KAY DON PIO ANG NGALANG POLO NG KANYANG BAYAN AY PINALITAN NG VALENZUELA.

Ang Pagdalaw ni Valenzuela sa Dapitan

NHCP Photo Collection, 2016

NHCP Photo Collection, 2016

Location: Rizal Shrine Dapitan, Zamboanga Del Norte

Category: Sites/Events

Type: Commemorative marker

Status: Level II - Historical marker

Marker date: 1981

Installed by: National Historical Institute (NHI)

Marker text:

ANG PAGDALAW NI VALENZUELA SA DAPITAN

NOONG HUNYO 1896, SI DR. PIO VALENZUELA, KILALANG KASAPI NG KATIPUNAN AY IPINADALA SA DAPITAN (NGAYON AY ISANG LUNGSOD SA ZAMBOANGA DEL NORTE) KUNG SAAN IPINATAPON SI DR. JOSE RIZAL. IPINABATID NIYA SA BAYANI ANG MGA BALAK NG KATIPUNAN SUBALIT TINUTULAN NITO ANG ISANG SANDATAHANG HIMAGSIKAN SAPAGKAT ITO AY “MAPAMINSALA AT NAGBUBUNGA NG KAMATAYAN.”

IPINABATID DIN NI VALENZUELA KAY RIZAL NA BINABALAK NG MGA MANGHIHIMAGSIK NA SIYA AY ITAKAS SA HAPON BUHAT SA DAPITAN NA LULAN NG ISANG SASAKYANG-DAGAT. TINANGGIHAN NI RIZAL ANG ALOK AT NAGPAYONG “PARA SA KALIGTASAN NG BAYAN, HINDI NA KAILANGAN ANG BALIKAN PA ANG ISANG TAO LAMANG.” SINABI DIN NI RIZAL NA “ANG MAMATAY AT MAKALUPIG AY NAKAKASIYA, SUBALIT ANG MAMATAY AT MALUPIG AY NAPAKASAKIT.”

PAGKARAANG TUMIGIL NG MAGDAMAG SA DAPITAN, SI VALENZUELA AY NAGBALIK SA MAYNILA AT INIULAT KAY BONIFACIO AT SA IBA PANG MGA PINUNO NG KATIPUNAN ANG KINAHINATNAN NG KANYANG MISYON.